Fréttir

Elsa Arnardóttir ráðin forstöðumaður Þekkingarsetursins

02.05.2018

Elsa Arnardóttir hefur verið ráðin forstöðumaður Þekkingarsetursins á Blönduósi frá og með 1. maí 2018. Alls sóttu fjórir einstaklingar um stöðu forstöðumanns sem auglýst var í byrjun árs.

 

Elsa er með B.A. próf í mannfræði og heimspeki frá Háskóla Íslands, diplóma í textíl við Myndlistaskólann í Reykjavík og er að ljúka meistaranám við Listkennsludeild Listaháskóla Íslands. Hún starfaði sem forstöðumaður Fjölmenningarsetursins á Ísafirði í þrettán ár, en á þessum tíma þróaðist starfsemin frá því að vera tímabundið verkefni með einum starfsmanni í opinbera stofnun á föstum fjárlögum. 

 

Sem forstöðumaður Fjölmenningarsetursins var það hlutverk Elsu að bera ábyrgð á daglegum rekstri og starfssemi stofnunarinnar auk þess að vinna að stefnumótun, áætlanargerð og þróun samstarfsverkefna m.a. með sveitarfélögum og fræðslustofnunum. Það mun einnig verða hluti af starfi hennar hjá Þekkingarsetrinu. 

 

Ráðning Elsu kemur í kjölfar sameiginlegrar stefnumótunarvinnu Textílseturs Íslands og Þekkingarsetursins á undanförnum árum. Fyrrverandi framkvæmdastjóri setursins, Katharina Schneider, mun starfa áfram hjá setrinu og hafa umsjón m.a. með verkefnaþróun, kynningum og upplýsingamál. 

 

Við bjóðum Elsu hjartanlega velkomna til starfa!